السلام عليكم
صباح / مساء الخير ..
شخباركم عساكم طيبين ..
هذا تقرير وحدهـ من أقاربي عن رحلتها الى كندا صيف 2008
وان شاء الله نكون خفيفين عليكم وتستمتعون معنا بهالرحله ..
وبتركها هي الي تتكلم عن رحلتها
كل الحب
هذي خريطه توضح كندا بشكل عام عشان تآخذون نظره عامه
سفرتنا من المملكه السعودية إلى المملكة المغربيه
كانت الرحله من الرياض الى المغرب 8 ساعات ومن المغرب الى مونتريال 8 ساعات بعد ..
أول شيء ببدأ خطوهـ خطوهـ
دخلنا مطار الملك خالد وخلصنا الاجرائات ورحنا للصالات
وطلعت الكاميرا قلت خلنا نلقط صوره
وبعدين رحنا صلينا الفجر أول ما آذن ..
وتأخرت الطياره عن الاقلاع نص ساعه كالعاده ..
وانا اشوف بالقزازه هالطياره اللي بنركبها كانت نوعا ما صغير موب الكبيره ونركب الطياره
وكانت صراحه عكس اللي توقعته كانت الطياره قدييمه ولا فيها شاشات قدام الكراسي ولا شئ ..
يوم شفت الدعوى كذا قلت اقول يا زين انوم بس
وهذي الصوره اول ما اقلعت الطياره وكان القزازه مرره نظيفه
ثم وقفت الطياره بالقاهره لمده 50 دقيقه نزل ركاب الظاهر ما ادري انا ما انتبهت الا يوم جاء بيهبط وكملت النومه لين ما اقلع
وصحيت قبل ما نوصل المغرب بـ ساعه يمكن ..
ونزلنا مطار المغرب كنت متوقعه انه عادي مرره مثل طياراتهم بس والله صار مطار حلو والظاهر كان توه مجدد
وهذي الصوره اول ما نزلنا من الطياره ..
ودخلنا عند اللي يقصون البوردينق ..
ولقينا سعودي كان منخرش حبتين
وسألنا قال انتم رايحين لمونتريال قلنا ايه .. قالت تقول ان الطياره اقلعت قال ابوي لا وين الاقلاع الساعه 3:45 متاكد قال اشوا ريحتنا مدري عنها ذي فجعتن ..
ويوم قصينا البوردينق فهمت منها وهي تسولف على خويتها والاخلاق قافله انها ما تغدت مدري ما افطرت
وكانت اخلاقها مرره زفت ..
وبعدين رحنا نتمشى بالمطار شوي لان كان باقي على الرحله ساعه ونص .. وكان الجو خيااالي ..
صورت لكم هالصوره من الدريشه
وبعدين صلينا الظهر والعصر ..
ورحنا للصالات وآخذت لكم صوره لها كانت الصوره من آخر الصالات لان اولها مرره زحمه ..
بعدين جلسنا بالكوفي نسولف مع خوينا السعودي اللي قبل شوي .. وكان قمه بالأخلاق وقعدنا نسولف شوي
وشوي واشوف الطياره اللي بنركبها وكانت اكبر من اللي جينا فيها من الرياض .. واخذت لها صوره علطول وكان الركوب لها رجليه مع الدرج
وكان يجيك هواا منعش يخقق
وركبنا الطياره وقلت اللحين منب نايمه خلاص نمت يكفي
اقلعت الطياره وجلسنا شوي وقدمو لنا وجبه غداء .. وهذي الوجبه الوحيده اللي كنت مروقه وصورتها بس
وجلست شوي بعد الغداء قلت اللحين يبدأ شغل الايبود وطلعت كتاب التصوير عشان اكمله لان الرحله كانت طويله تقريبا حول 8 ساعات ..
الكتاب صراحه مرره حلو وانصح كل واحد يهتم بالتصوير يشتريه من مكتبه جرير
اسم الكتاب : اسرار التصوير الرقمي
وشوي وانا مفهيه بالكتاب واشوف السحب والله يا هي تخقق واشوف القمر قلت هلا بيييك طلعي الكاميرا خلنا نلقط لها صوره ..
صراحه كان المنظر روووعه
وكان اتجاهنا مع عقارب الساعه مدري العكس يعني نمشي مع النهار
والحمدلله وصلنا لكندا بتوقتهم تقريبا الساعه 7 تقريبا .. وكان يأذن المغرب عندهم الساعه 9 الا ربع ..
ولقطت هالصوره بعد الفهاوه وانا قاعده اشوف هالانهار
وبعدين نزلنا لمطار مونتريال وصراحه كان المطار حقهم بطل والتنظيم عندهم حلوو مرره
وشوفو ها المطار مع هالزحمه ما كملنا 10 دقايق الا وحنا طالعين
وطلعنا وأخذنا سيارة وهذهـ صورهـ لنا واحنا بالطريق متجهين للفندق
وكان اسم الفندق Park Inn وصراحه كان الفندق رووعه وهذي صوره للوحته ..
وهذا الفندق من برا
وهنا كان المدخل حقه وهو فندق كبير وطويل من ورا
وهذا السيب وانا امشي قمت اكبس بعيوني اشوف اقول هذا اللي اشوفه صدقي ولا مرايا ..
شوفو وش طول السيب
ودخلنا الغرفه وكانت مرتبه وحلوه بالحيل
والحلقه القادمه بتبدأ جولتنا حول القرى بكوبيك وراح تشوفون مخطط السير بإذن الله ..
وهذي صوره لإحد القرى من الحلقه الجايه ..
وكان الجوو خقق
وبكذا ننهي الجزء الأول
ترقبووا الجزء الثاني
